الخيانة الزوجية.. أزمة تهدد الأسر المصرية
في مجتمعنا المصري، مشكلة الخيانة الزوجية أصبحت واحدة من القضايا اللي بتهدد استقرار البيوت وبتكسر روابط الأسر. سواء كانت الخيانة من الزوج أو الزوجة، فالنتيجة واحدة: بيت بيتدمر وأطفال بيتحطموا نفسيًا.
الزوجة.. المظلومة اللي بقت متهمة؟
كتير بنسمع إن الست هي اللي بتلجأ للخيانة. طيب ليه؟ تيجي تسمع واحدة تقول "جوزي مش كويس معايا." طيب يعني إيه مش كويس؟ بتكتشف إنها بعد 20 سنة جواز، ومعاها أولاد، بتكتشف إنه مش مسؤول. طب فين كانت قبل كده؟ للأسف، كتير من الأهالي بيضغطوا على البنات يقولوا: "استحملي.. هيبقى كويس." لكن للأسف، ده غلط كبير.
لما الزوج يطلع مش كويس، الأسباب كتير:
إدمان المخدرات أو الخمور.
الضرب والإهانة.
الاعتماد على الزوجة في كل حاجة. يعني تشتغل وتصرف عليه وعلى البيت والأولاد، وهو عاطل قاعد على القهاوي أو في البيت طول النهار.
في الحالات دي، الست بتوصل لطريق مسدود. وبتبدأ تفكر في الطلاق أو الخلع كحل. لكن أحيانًا الضغط النفسي بيكون أكبر من قدرتها على التحمل، وساعتها بتلجأ للخيانة كمهرب من الواقع المرير.
الزوج.. السبب الرئيسي؟
كتير من الرجالة في الحالات دي بيتعاملوا بأنانية شديدة.
مش بيهتم بمراته إلا وقت العلاقة الحميمية.
بيهملها طول الوقت بحجة: "روحي شوفي أمك."
بيكون قاسي الطباع ومعاملته سيئة.
ده نوع من الرجالة اللي بيدفع الست إنها تحس إنها مش موجودة في حياته غير كـ"خادمة" أو "زوجة على الورق."
السبب الحقيقي للخيانة.. مين المتهم؟
الحقيقة إن الخيانة مش قرار بسيط، سواء من الزوج أو الزوجة. لكن في كتير من الحالات، الأسباب بتكون مشتركة. الزوج ممكن يكون السبب بأسلوبه القاسي، والزوجة ممكن تكون اتسرعت في اختيارها من البداية أو استسلمت للضغوط.
الحل.. مواجهة المشاكل من البداية
لو العلاقة مش ناجحة، لازم يبقى فيه حوار واضح بين الطرفين.
لو الزوج مش مسؤول، مش المفروض الزوجة تستحمل وتضحي بحياتها كلها.
دور الأهل لازم يكون داعم للزوجة مش ضاغط عليها.
الخلاصة:
الخيانة الزوجية مش حل لأي مشكلة. لازم الطرفين يواجهوا مشاكلهم بشجاعة. ولو الحل الوحيد هو الانفصال، يبقى أفضل من كسر الأسر وتهديد مستقبل الأطفال.
بقلم كل من : وائل الهادي- لجنة الثقافه المصريه